經過一兩年嘅觀察，前前後後都睇過近百個學生嘅水準，國際學生編程能力的確係比較強，原因如下
- 佢地係學校揾到同路人，讀本地學校嘅極大機會揾唔到。國際學生會主動參加比賽，而香港本地學生要阿Sir踢先會郁，好似谷玩咁
- 國際學校有自己computing conference ，佢地會講下最近做左咩，總之佢地嘅性格就係開放好多，會主動同人溝通到。本地生基本上好似自閉咁
- 國際學生好多時都有Github，我見到佢地不停寫不停係Github同人吹水，本地學生無呢個動作
- 國際學生返到屋企無乜功課做，私人時間多，多左自由探索呢個世界嘅時間。本地學校幾十年無變，認為要餵學生食先係老師功勞，間接燒哂學生時間
- 國際學生好少補習，香港學生補到隻狗咁，最好笑就係補啲自己根本唔鐘意嘅科去chok成績。我懷疑國際學生嘅家長係咁諗，佢地係社會都係中上層，根本唔洗個仔用成績去換取個仔向上爬，而本土家庭絕大部份仲認為個仔要攞好成績先有前途
- 國際學生Top嗰批我見到佢地有github pull request，本地學生無。國際學生所用嘅stack同工具更接近業界人士，而本土學生一句說話講完：玩玩具
有幾點值係注意：
- 唔好以為國際學生佢地屋企擲好多錢俾佢地學編程，佢地好多都係得部macbook，反而本土學生學乜學實，屋企肯洗錢俾佢地學STEM。但最終結果本土學生俾國際學生反殺，原因好簡單，私人探索時間比金錢更重要
- 唔好以為國際學校好多錢擲比啲學生，啲國際學生話俾我知學校唔會俾錢佢地玩任何野搞任何活動。反而本土學校有更多嘅錢去搞呢搞路。國際學校贏在嗰嗰位就係做中間人，老師知自己唔係編程專科就會line up啲高手俾學生，等佢地自己搞。而本地學校就要係教學到揸Fit，所有野最好親自教。本地學校都有揾教育公司到校教，但呢個market已經玩爛左，香港啲教育公司係派未畢業嘅學生去教，而教育公司當學校係水魚，裏面做嘅人亦都唔係業界正一線programmer。國際學校嘅阿Sir揾業界人士介紹俾佢地啲學生識，記住，唔係去教，係識，姐係做個朋友嗰種，咁其實勝負已分
- 科研最重點係自發性，國際學生搞左個research council
家長取勝之道：
如果有兩個學生，同樣鐘意寫Program，有着同樣嘅天份，勝負在於兩樣野： 邊個有更多時間投入嘅贏，邊個撞到可以帶自己嘅人贏
國際學校其實根本乜都無做到，佢地係唔做一樣野，燒哂學生啲時間
Post Views: 222